Las differentas fuormas da balcuns torts e sgrafits sun ornamaints unics. Tipicas sun eir las portas d'chesa doblas arduondas. Las chesas veglias uneschan suot ün tet la part d’abiter e quella da lavurer. Las trais parts principelas, nempe la stüva, la chadafö e la chamineda sun arrandschedas intuorn il suler. Suot il suler as rechatta la cuort.
Las stüvas engiadinaisas sun suvenz da dschember e lung las paraids da las veglias stüvas da pur es francho ün baunch. I'ls ultims tschientiners ho la famiglia Albertini contribuieu fermamaing al purtret da La Punt; ella ho lascho fabricher bgeras da las ourdvart bellas chesas patriziaunas. I'ls ultims decennis ho eir l’impressari cuntschaint Andrea Peter Laudenbacher furmo il purtret da la vschinauncha. Suvenz s'ho adatto las chesas nouvas al stil engiadinais.
A La Punt do que differents edifizis remarchabels: Dasper las baselgias daun in ögl specielmaing las chesas da las famiglias Sandoz ed Albertini, scu eir la Chesa Merleda. Eir las chesas Planta e Pirani e la chesa Stambuoch haun ün’architectura extraordinaria. Ils detagls da las particulariteds architectonicas da La Punt-Chamues-ch sun descrittas i’l inventar dal territori abitabel "Siedlung und Bauten", publicho dal 1990 da la chüra da monumaints chantunela.
